Net van Zus

Nichtendaag


Weej hadde eindelik weer ens ‘nnen nichtendaag. Teminste, zoeë neume weej ’t want die nichte zien eigelik ’n soort “gemingk bedrief”. ’t Zien de dreej nichte van Hendriks en de dreej zuskes van Kuijken. Twieë femilies die al vanaaf d’n oorlog met elkaar verbónde zien. En ’t zien toch meistal de vrouluuj die zónne band aanhalde. Maar noow waas ‘t door det Corona gedeuns lang geleje det weej ós live gezeen hadde.

Ós groeëte nich had ’t prima oet d’n aek gedreid en hiel vakkundig ’n beejeinkóms georganiseerd.
En zoeë kwame dus zes maedjes van 64 bis 79 jaor beej um toes beej mekaar. Ziene mins waas dor ouk beej. Hae bouwde nog efkes ‘nne escape in door te zegge det hae meugelik ’n stök ging wandele, maar vónd ’t bliekbaar waal gezellig beej de vrouwluuj.

Idderein waas met ’t OV gekómme. Det was neteurlik prima veur ‘t milieu, maar ’t kwaam toch veural door de mankemente die weej zoeë langzamerhand beginne te vertoene. Weej zien neet mier zoeë kepot van autorieje, en al zeker neet op de groeëte waeg en in ’t duuster. Daonaevebeej: ik zellef bin gaar neet kepot van autorieje. Laot mich maar lekker in d’n trein zitte.

Beej de kóffie met vlaai woorte die mankemente iers ens effe oetgemaete. Eigelik hadde weej allemaol waal waat. Ik deze kier ouk want mien knäök beginne steeds mier en steeds pienlikker te rammele. Maar ik meug zeker neet klage as ik ’t allemaol zoeë aanhuurde.

Daonao ginge weej euver nao de kinder en de kleinkinder. Nich Muis waas net weer oma gewore, Ik kós stróntse met ’n foto van ’t ster-ke van naef ein en vertelle det dor beej naef twieë ouk iets op kóms is. De kleinzoon van groeëte nich waas met zien opa en oma op bezeuk gewaes beej Mark Rutte. En zoedoonde makde weej ’n oetstepke nao de polletiek. En weej ware ’t dor euver ins det dor allein maar erge en iets minder erge pollitieke figure zien, en det die twieëde kamerdebatte gen verheffende vertoeninge zien.

Toen de hepkes en de sepkes op taofel kwame ware weej beland beej de res van de femilie en dan veural de breurs, die nateurlik gans anders zien dan weej. Daen eine vreegezelle broor woort toch waal erg eigewies. “Det hebbe die vreegezelle allemaol, nemes corrigeert die mier”, zag Muis (met ’n schuunse blik in mien richting, maar ik zoog ‘t waal.). Dao waas de res ’t waal mei ins, maar det gold neteurlik neet veur mich (zagte zeej teminste).
Weej hadde ’t allemaol meigemak dat die breurs vruger noeeïts ‘nnen telder hoofde aaf te wasse. Beej de zuskes waas ’t nog erger. Die meuste ouk de zakdeuk veur de jónge klaor legge. En die meiste van die jónge hebbe ouk nog vrouwe gevónde die eur in de watte legge.

Groeëte nich goof met zien uig ’n seintje nao ziene mins det hae weer ens in kós schödde. En zoeë kwame weej op femiliepetroene. Geej mót weite: Die vrouluuj van Hendriks die hebbe ’t regele in zich. Die zeen waat dor nuuedig is en zörge daoveur. En eur mansluuj geveuge zich dao in.
(“Ik vind ’t waal zoeë gemekkelik” zag de mins van groeëte nich.)
Det waas beej de Kuijkens anders, dao was pap d’n baas. Misschien umdet die ’n eige bedrief hadde?
Weej storten ós in ’n discussie euver rolpetroene en emancipasie en feminisme. (“Maar wie se toen met ‘nne kepotte auto stónds, meus se mich toch belle”, zaet de mins van groeëte nich toch efkes fien).

En dan is ’t tied veur ’n suupke met ’n hepke en verdreid lekkere bavarois pudding. En mótte weej kieke wie ’t zit met de vertrektieje van de busse en de treine.

Weej were netjes nao ’t station gebrach (dan zien kaerels toch waal hendig). Dor wuurd nao hoes gebeld wie laat de menkes eur vruikes van de stasie kinne aafhaole (idem).

In d’n trein toete mien oere nog van allemaol det gealdebet. En bedink ik mich waat ik nog allemaol had wille vraoge en vertelle.

Det mótte weej ech gauw weer ens doon!


Net van Zus

 

Aanvullende gegevens