Herfs
Ik waas net truuk van verkansie
En wis neet wat ik zoog
Wie in de winkelschape
De paeperneut en de speklasie al loog
De zomer waas dus al haos ten einde?
Gedaon waas ‘t met die volle zón
Maar ik waas dor nog neet klaor veur
Woel det dae herfs maar noeëts begón
‘t Waas asof ik nog veulde
Wie det zunke brandde op mien erm
En ik preufde nog dae sangria
‘s Aoves, boete, stil en zwoel en nog ‘n bietje werm
Maar as ik noow nao boete kiek
Zeen ik ech waal de blaedjes valle
En eikels oet de buim
Op ‘t daak van miene auto knalle
Ein groeët spinneweb naeve miene raam
En ’s morges hiel vuul mis
‘t Is misschien ouk umdet ik weit
Wie moeëj det toch dae zomer is
Maar och, we zulle der waal weer aan winne
En de winterjas van zölder haole
En de schouw ens laote vaege
En zörge veur wat holt en kaole
En ik hald maar in gedachte
Al is de herfs ouk pás begónne
Det der nao elke oktober
Weer eine nieje mei zal kómme….
Anja Cuijpers
