Zomer
De linte kwaam in vol ornaat
en goof ós nieje mood
de waereld kreeg weer kleur
en kriebels kreeg ik in mien blood
wao iers de sniej gelaege had
van wal bijna eine maeter
waas ‘t graas opniej waer greun
en det vond ik huul wat baeter
de buim stónde vol met bloesem
te prónke langs de waeg
en met die werme zonnestreulkes
waas miene winterdip gauw weggevaeg
noow dalik nog dae zwoele zomer
de einentwintigste um twellef oor
steit de zón ‘t hoegst baove ózze kop
en is ‘t de langsten daag van ‘t jaor
zomer, wát ‘n moei seizoen
zwimme, zónne, vekansie viere
ieskes aete, barbecue
vlinders, bije, mugge, miere..
ik neem alles wat dur beej huurt
want ik bin zoeë in mien element
nao de zieë zoe ik waal wille
de duine beklumme, kampere in ‘n tent
schién maar zunke, laot dich zeen
en gank neet ónder veur ‘n oor of nege
dan hoof ik um verkansie te viere
neet nao ‘n ander land te vlege
in mien tuintje geneet ik nao
‘t leech, de wermte mak mich blie
wat kin ik toch geneete
van dit moeie jaorgetie!
Anja Cuypers
