Nostalgie
Soms dan druim ik euver vruger
Wie ik kind waas en nog klein
Ónbevange ónbezörg
De waereld waas zoe fijn
Wis ik vuuël euver leid en oorlog
Jao, ‘t woord waal ens verteld
Euver kiendjes met dieke buukskes
Zónder aete, zónder geld
Maar mien waereld waas neet groeter
dan d’n haof vol kersebuim
‘n ren met kiepe, ‘n graasveld, ‘n schöpke
det waas miene speultuin
De zandberg naeve d’n Horsterwaeg
de treine beej ós achter
de spoorwaegeuvergange
bewaakt door ‘nne wachter
Fietsend nao de Schatberg toe
zomers die maonde leke te deure
en met vastelaovend leedjes zinge
en dan d’n Horsterwaeg aaf leure
Kind kinne zien in volle glorie
danse in ‘n zomerwei
renne, lache, schriewe, bäöke
wae duit d’r nog ens mei?
Make we same ‘nne krink
legge we de zakdook neer
en as we um gevónde hebbe
beginne we gewoën weer
Hinkele, winkelke, balle goeie
verstôpperke en kriete op de stoep
hole grave, schómmele, wippe
dreije met d’n hoela hoep
Veur ‘n döbbeltje slók gaon koupe
beej de winkel op d’n dreij
belga nogablok of toverballe
wae geit d’r met mich mei
Dan heb ik nog wat moeëie knikkers
die zitte in ‘nne bónte zak
dae haet mien moder gister nog
speciaal veur mich gemak
Renne, speule, lache same
door ‘n wei met hiel hoeëg graas
kós ‘t nog maar efkes
zien wie ‘t vrueger waas………..
Anja Cuijpers
