Ganzebord
´t Laeve is ´n ganzebord
En weej zien de piónne
‘t Laeve is gewoeën ‘n spel
Door ószelf verzónne
´n Kaart van diek karton
Det is ózze waereldbol
’n Spel det wuurt daorop gespeuld
De kaart is euvervol
Bis se ’n roeëd holter menke
dan dans se door ‘t laeve
en meugs se dienen buurman
‘nne knal veur zien köpke gaeve
Bis se greun dan zit se
geregeld in de put
en mós se wachte órelang
soms waal wies aan diene vut
gael beteikent zónneschien
de vluugs euver ‘t speulveld haer
want speule met ‘t laeve
det duis se toch zoeë gaer
‘n blauw pupke haet genne mazzel
niks ouk waat um boeit
mót idderskier dreej stappe truuk
en haolt ‘t einddoel noeit
ik zat dor nog wat kleure beej
gemingk met de primaire
die vinde ganzebord ouk leuk
en wille ouk probere
mei te loupe op deze paad
en kiek, die wille niks misse
ze zeen ‘t moeie van dit spel
óndanks de hindernisse
ze weite de eindstreep te bereike
maar det is neet eur doel
ze vinde de waeg dor nao toe zoeë moei
al valle ze aaf en toe in de koel
’t ganse laeve is ’n spel
en hebs se det in de smieze
dan meugs se meidoon met ‘t ganzebord
dus pak maar gauw dien bieze
maar duis se ‘t ónveurbereid
en wils se niks dan winne
met ‘t verstand op nul en ougkleppe op
dan kin se maar baeter
gaar neet dor aan beginne
kóm, zeuk dich ‘n kleur
en goei daen dóbbelstein
dan gaon we same ens op paad
des baeter as allein…
de kums ech niks tekort
ik lier dich ganzebord.
Anja Cuijpers
