Erm
Ik zoog lets op tv
‘ne moeie jónge neger
Lank en slank en broeën en moei
Hiel röstig en integer….
Hae stónd wat te hange
Op ‘t hukske van de straot
Gekleid in haempje en joggingbóks
‘t waas ‘nne kindsoldaot
Zien ouge keke wat waezeloos
Ze hadde eure glans verlaore
Net of hae door d’n oorlog
‘nnen andere kaerel waas gewaore
Toen zoog ik pas zien ganse lief
Hae stónd in de zón en ‘t waas werm
Zien huid die blónk van ‘t zweit
En wat ik misde ware zien erm
Twieë stömp aan zien schouwers
Wao erm zote in ‘t verleje
Maar um ein of andere dómme raeje
Hadde ze die der aaf gesneje
Ik dach; wat is de waereld slech
As “ze” gezónde minse gaon verminke
En wae, in godsnaam
Kin zoeëiets nou bedinke
Dae jóng zal noeëts mier emes umhelze
As hae zaet;” ik hald van dich”
Of noeëts ‘n vleeg weghouwe
Die plaogt in zien gezich
Nog waeke zoog ik dae slungel staon
Hoewel ik um netuurlijk neet kin
Dink ik nog dök aan um
En schaam mich bijna det ik mins bin….
Dalik gaon weej waer baeje
Veur dae vrede dae der toch noeëts zal zien
Taege oorlog, hónger en geweld
Veur zieke minse met vuuel pien
Maar as weej de kerk oetloupe
Zien we alles waer vergaete
En gaon we met z’n allen
Waer ‘nne lekkere knieën opaete
Pakke ‘nnen borrel op ‘t nieje jaor
Make ós belastingaangifte vas klaor
Belle de sportschoeël veur ‘n niej abonnement
Bouwe ‘n feesje in de tent
‘t Geit ós toch zoeë good
We dinke lever neet aan oorlog en blood
Laote we ens met z’n alle probere
In te zeen det ‘t dök gen film is wao we nao kieke
Maar ‘n documentaire…….
Anja Cuijpers
