Update
Veer maond in ‘nnen hoeshalt met pubers mak waal det ik waer gans beej d’n tied bin . ’t Is eigelik ‘nne verjóngingskuur, oftewaal ‘nnen update zoe wie det allewiels hit. Minnige vieftig plusser mót dao vet veur dokke, maar ik krieg det dor heej gratis beej.
’s Morges zeen ik vanaaf mien bedje in de hoeskamer de gansen hoeshalt veurbeej trosse. Zwiegerse kump iers, maar det is ’n vrouw en die duit ’t dus zutjes aan, zoeëdet ik eur meistal nog neet ens huur.
Nummer twieë is aldsten broor. Noow make kaerels altied vuuel mier leweit dan vrouluuj. Dus dan weer ik al wakker as hae de trap aaf dendert. Wie ik dor pas waas zag ik nog vrintelik goojemorge, maar dan kwaam hae beej mich zitte um d’n daag door te neme. Allewiels doon ik maar net of ik nog luim, want ik bin ’s morges neet zoeë aanspraekbaar.
As broor vertrokke is duike de kets en de Gammaboy op. Dan begint de ganse hut nao tosti’s te ruke en wuurt dor oetgebreid gediscusieerd euver de lesse, de meisters en ‘t zwaore laeve det zeej hebbe. Det leste vind ik nogal meevalle. Dreej les-ore is allewiels al ‘nne zwaoren daag. Of nae, ‘nnen ‘heftigen’ daag. Det waas vruger waal anders. Weej meuste de gansgoddlikken daag nao schoel en hadde gen tössen-ore. En zelfs op zaoterdaagmorge woorte weej verwach aanwezig te zien. Neet det det indrök mak op die twieë, want det zien verhaole oet de middel-iewe.
De Gammaboy praot ’s morges met extra depe stum. Det is waal sexie vind hae zelf. Ik bin ’t neet dök met um ins, maar ik mót toegaeve: ’t haet waal waat.
En dan kriege weej ’t wie vanzelf euver leefde en menkes en vruikes. Det is dor waal waat mekkelikker op gewaore. Weej makde vruuger nog oetgebreide analyses euver minse. Maar det hoof neet mier. Dor zien volges de Gammaboy allewiels dreej soorte vruikes: moeëje, lillike en alde. Ik bin zoeë vreej um mich maar beej die letste categorie in te deile. Veur de moeëje kóm ik zoeë wie zoeë neet in aanmerking en de lillikke is ouk neet alles. Ouk kaerels zien dor in dreej soorte: echte kaerels, sissies en loosers. De sissies ware veur ós vruger de softies. De loosers zien bliekbaar hampelemanne. Echte kaerels zien dor neet zoevuuell. Maar zeej hebbe ’s morges waal eine depe seksie stum.
De leefde geit beej de Gammaboy veural door de maag. ‘t Wichtigste is wie de toekumstige broed ‘nne staek zal bakke. Noow begriep ik precies waorum ik noeëts aan de man gekómme bin.
’s Aoves geit mienen update wiejer. Ik bin taegeswoordig gans geïnformeerd euver de x factor, de voice, de kaerels van Tatjana en det soort gedeuns. Ik heb nog noeëts zoeë vuuel lieke gezeen. En ik weit noow ouk det iets ‘vet’ is of ‘ranzig’. Of dao ouk waat tössen in zit heb ik neet gehuurd.
Ouk de naeve vónden ’t hoeg tied det ik ge-update woord.
Naef twieë zoel veur mien nieje hut de audiovisuele installatie verzörge (let waal, det is gans waat anders dan ‘nne tv en ‘nne radio huur). Ik kreeg ‘nne mail met ’n veurstel veur ‘n “crappy setje”. Hae hat net zoe good spaans kinne schrieve. Weit ik vuuel waat crappy is. Jóngste broor dach det ’t, gezeen ’t prieskaertje, waal iets goods meus zien. Maar ik had ‘t dor neet op. Ik vónd crappy neet ech good klinke
Toch maar efkes naogecheck beej naef twieë. En maar good ouk. “Jesus Net, wets dich det neet, dich bis ech olms”.
Crappy is dus gaar neet bes. Ik snap waal neet waorum hae dan met det veurstel kwaam. Maar ik heb nog vuuel te liere!!!
Net van Zus
